[عبدالحميد بن ناحي]

[poem="font="simplified arabic,5,black,normal,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]غنّ ياذيب السهر جاك الهجاد = العشا الليلة من الهاجس قصيد
هاجس(ن) في كل مايطري تراد = بين بيد وبين قيد وبين عيد
عين تجمع دمع لايام العياد = وعين تجمع ضحك للدمع الزهيد
عاد قلت العيد عيد الله وعاد = عيد جرح وعيد لاحبابي سعيد
صاحبي لاهدّك الليل وتماد = لاتضيق وكل خلق الله عبيد
كان صدرك ضاق من ( بانت سعاد ) = فال عينك ليل للفجر البعيد
ولو تكنّ الدمع بالطرف الجواد = ماتهيد ولا تفيد وتستفيد
فكّ صدرك مابقى فيها حياد = دامها للموت ماعنها محيد
صاحبي من منطلق حكم العباد = عطني المجمل وانا اعطيك المفيد
من متى ملّ اللسان من الوكاد = ومن متى طلع النخل ملّ الجريد
ومن متى وسهيل بيديه البراد = ومن متى والجدي للرمضا يعيد
مازرعت الحلم من شان الحصاد = ولا سقيت الزرع لو طلعه نضيد
ومن حرث جمر الشقا تحت الرماد = قال كيف الحال ياعبدالحميد
قلت كان الحلم يرعاه الجراد = ماسلم بضلوعي الجردا وريد
لاتقول الشعر للبندق زناد = ولا تشبّ النار من فوق الجليد
خاب ظن وظن من ظن استفاد = وخاب راي وراي من سلطة سديد
من متى حلم الدول خانت أُحاد = ومن متى والشعر للدنيا رصيد
قل متى المسلم مع المسلم تواد = وقل وش اللي عقّب الجد لحفيد
وقل معي كانك بشر ماانت بجماد = ولا انت عباسي لهارون الرشيد
من عطا للغرب في باب البلاد = قبل لوم اهل البلاده للبليد
إيه جت من غاد يابغداد غاد = بس من يجمع ضديد(ن) مع ضديد
من يقول الشرق وسط الغرب باد = قال اعرف الغرب للمشرق يبيد
ومن عرف فرق البياض من السواد = قال اعرف النار من لين الحديد
ومن عرف كسرى على هالفرس ساد = عارف(ن) قيصر على اهل الروم سيد
ومن دفن بالريح إرم ذات العماد = له قدر يفعل بخلقه مايريد
طارقات الليل من باب النكاد = علم غيب وعقد للصابر فريد
صاحبي كانك تهيم بكل واد = باد غيرك وانت لك باكر يبيد
صاحبي غنّيت من ذيب الهجاد = والعشا الليلة من ضلوعي قصيد[/poem]