ما مرتاح ْ
ما مرتاح ْ
عيوني تستحي بس الدموع " وكاح "
ما مرتاح
منّك : منّي : من الجاي : من الــ.. راح
ما مرتاح
عركه ويا الزمن ورجعنه مكسورين
وبعيده المسافه وينسى الــ.. طاح
ما مرتاح
لأن شفت الشمس نزلت تبوس " الكاع "
وبكف الطفل تنلاح
ولأن قاضي البلابل مدد التوقيف
ومفتوحه السما
والفيل عنده جناح !
ما مرتاح
لإن قفل المحبه " إنباق "
وترهم عليه مفتاح
ما مرتاح
متروك بجزيره وتيهت بالليل
وإجو ربعي عليه بـــ.. قافلة أشباح
وإنته إشبيك ؟!!
لمّن دافعت عن نفسي صابك غيض
مو حتى القنافذ من تحس بـــ.. الخوف
تستخدم جلدها سلاح ْ
ولاجن الفجر مثل الفجر محبوب
لون الفجر صاير يقبض الــ.. أرواح
مامرتاح من ربعي ولا مرتاح ْ
تمساح بــ..نهرهم صاحوا من الخوف
وجازفت بــ..حياتي من سمعت صياح ْ
صارعت المنيه وبيده هزني الموت
ومدما طلعت
صفقوا للــ.. تمساح
كل هذا وتريد أرتاح ْ
مامرتاح ْ
نادوني وركضت بــ.. ليل
إيد الرسن بيها .. وإيد بيها سلاح
عثرت مهرتي ... وربعي قبل ما أطيح
واحد قال للــ.. ثاني :
أبشرك طااح !
كاظم اسماعيل الكاطع