.
جور التعب جور .. والدمعة هي الدمعة
............ والجرح واحد .. ولكن تفرق أوجاعه!
:
والحزن.. درب الهجوس.. وخوّته جزعه
.......... والصبر .. ستر النفوس .. وملهم أطباعه
:
والحلم .. نصف الحنين .. وغايته خدعه
........... والوجد .. بكر القصيد .. وحادي إبداعه
:
والحب ميثاق .. وقلوب البشر .. سلعة
................. والنّاس بالنّاس .. شرّايه وبيّاعه!
:
وانته.. وطيش الهوى.. والملح.. والشمعة
................ جمـاعةٍ .. ما تجمّعتوا على طاعه!!
:
لبيه .. ياللي خذيت من الحشا .. قطعة
............. عليك عين السهد .. شفقه وطمّاعه
:
من قبل لا تطري الميعـاد .. والرجعة
.................. وأنا أحتفي باللقا .. وأجمّل وداعه
:
عامين .. والقلب بين أشواقه ومنعه
............... مثل الّذي يمشي .. وعينه لـ مرجاعه!
:
ما يكفي إنك.. وأنا.. والشعر.. والشمعة
................ حبايبٍ .. ما تجمّعنا .. ولا سـاعه!؟
.