كنّا انا وانت سوى
نلعب حكي
نرسم صور
نمزق صور
نخربش ع حيطان الدهر
يطلع شعر
000
كنا اذا شفنا الوجع
نحكي معو
ت نقلعو من مطرحو
ونزرع ورد
يطلع لفوق
شفاف الحلم
ضحكة وعطر
000
كنا اذا شفنا الظلم
نمزح معو
وان ما فهم.
انكسّرو
ونعملو مثل القصب نايات
ت نشوف كل الناس
عم تعزفو
000
ولما الحزن . يفتح جرح
نمسك غيوم السما
ونلفلفو
وان ما كتم
ننصب خيام الفرح
قوس وقزح
لنطيبو
000
كنا اذا شفنا القمر
ندق الكحل
ونكحلو
نقلو غزل. تنّزلو
شعرك سبل. خيوط الضو
وطلوع الصبح
وجهك رفوف الحجل
تمرح على سفح الجبل
عيونك حرز
معلق على كتف الطفل
صدرك سهول الواسعة
وحط الحمام. وما خجل
خصرك نخل
مفيّ على باب العمر
تمرو حلو
مثل القصيدة العاشقة
بيت الشعر