قالت احبك قلت ياباشة الغيد
..........ادري ولكن مجتمعنا منعنا
قالت احبك قلت سور التقاليد
..........سوى حواجز بيننا وانقطعنا
قالت احبك قلت من غير تفنيد
..........ياليتنا في بعضنا ما وقعنا
في سابق الايام كنا اجاويد
..........احباب من نزف المشاعر صدعنا
عذبنا شباك السهر بالمواعيد
..........ياكم نسولف ليلنا ماشبعنا
حنا قطفنا حاليات العناقيد
...........في غيبة الحساد محد ٍ سمعنا
امالنا مركب سفر طافت البيد
..........عزم الشباب اللي تحدى ودفعنا
كنا على نهر المشاعر مواريد
..........درب ٍ مشينا منه غصب ٍ رجعنا
قصة غرام اثنين عشنا مطاريد
..........نسيت كلي معك والود معنا
واليوم من كثر العتب والمناقيد
...........ماعاد نسأل عن سبايب وجعنا
احلامنا شابت وكانت. مواليد
..........والياس دربه ياعيوني جمعنا
الشعر ماله بعد الاحباب تمجيد
..........لولا عيون احبابنا ماسجعنا
اطرد ورى شرد البيوت المجاويد
..........لو كان قاف الشعر ماهو طمعنا
ماعاد ينفع نقل شلف وبواريد
..........كل ٍ يقول اليوم يارجل طعنا!
ثالثه. سنه مابين صد ٍ وتهديد
..........عشنا وشفنا وضعنا . وانفجعنا
يمر. يوم العيد ماكنه العيد
..........وين الفرح. والحب يابنت ضعنا
محمد الثوعي