"ألف حاجة" .. على الماضـي خَـذتْهـا الحميّا
كيف أبنـسـاك وأنسـى آمـرّ وأحلـى الحكايـا!!؟
.. لـك بقايـا هناك .. ولـك بقايـا .. هنّيـا
واكثر اللي يـضـرّ العاشقـين .. البقايـا!!
يـوم علقتني بـك .. للسفر قلت هيّـا
ما ثنتك الدموع .. وْلا نحيب الحنايـا!
رحت.. وأنكرت ظـلٍ عشت تحتـه تفيّـا
ولّا انا ما قدرت أنساك رغم الخطايـا!!
صاحبي.. ماتغيّر شـيّ .. رغـم الجفـيّا
صورتك في العيون .. وسيرتك في الشفايا!!
لو من البعد.. سافرت أبعد من الثريّا
والله إنك على القلب اقرب من النوايا!!
..كـلّ شـيٍ عـلى توديع ماضيك عيّـا
الشعر .. والأغاني .. والصور .. والهدايـا!
.. كيف تستغرب النسيان إذا ما ماتهيّـا؟
..دام الأربع جهات-لوجهك- أربع مرايـا!!