قلبي مدينة حب من غير سكان
............عاشق ولكن مالقيت النفاعه
ياكثر ما مروا حبايب وخلان
............بالعمر ما غابوا عن البال ساعه
من حب واخلص ماتعذّر بالازمان
............وكثر المتاعب ماتغيّر طباعه
واللي تشكّل بالزمن عدة الوان
............هذا مصيره للفلس والشناعه
من كان له مبدأ مع الوقت كسبان
............واللي عطا من قلب عنده مناعه
لا قلت انا انسان عاشق وفنان
............ماقلت غير الصدق صنت الوداعه
فتحت باب القلب للوصل عطشان
............شربت. من. كاس الغدر والبشاعه
خذيت من درس المقفّين برهان
............ماني مدوّر بعد هجري شفاعه
بعض السوالف تركها خير واحسان
...........الصمت في بعض المواقف شجاعه
حزين لكن. مالك الصبر سلطان
............مركب غرام اليوم بطوي شراعه
عشت العمر بين المتاعب والاشجان
............اكبر خطأ قلب ٍ عطا باندفاعه
غنيت من نزف المواجع والاحزان
............لاحب صادق في زمان القطاعه
ولهان وابحث عن مشاعر والانسان
............اكبر طموحه قلب كله قناعه
محمد الثوعي