| وحيد، واربع كراسي خشب |
لـ الصدر حطّاب (ظِل الموت) في فاسه !
__ ياحاطب الصدر / لا تَرحم ولا ترفى !
تكفى اترك الصبح فيني ، مَـ انت غرّاسه
__ لا تحطب الصبح! خل الصبح لي تكفى
تعال ، واحطب "يبـاس الليل" ونْعاسه !
__ واحرق (شتاءْ الجفن) بدموعي! عشان أدفى
كان الوعد .. وردةٍ طفلة .. وميّاسه !
__ من قبل ، ريح المفارق بالجفا تزفى
وصار الوعد ، "جرح يترنّح!" معه كاسِه !
__ صحّى - قصيد العتاب - وقال لا تغفى
يبكي ، ويرمي على "كتف المِسَاءْ" راسه
__ ويزيـد كاسِه حنين .. ويشربه صرفى !!
واللي سجد "لـ الهواءْ" والحُب قدّاسه !
__ يسجد ، يبي القرب من محبوبته زُلفى
عشان عطرٍ / من المرفى ونسناسه !
__ خلّاه يسجد .. لريـح العطر والمرفى !
مسكيـن من تاه في فكره وهوجاسه
__ وصار لخطاطير "ضيّاع الوهم" ملفى !
العاشق (اللي شموعه تحرق انفاسه)
__ وماحوله الا السـواد بـ زاوية منفى ..!
يسأل سكون الكراسي .. عن بعض ناسه
__ كل مانتظرهم وفَى ، كان الغياب أوفى !!
في عيد ميلاد ناسه ، تقتل احساسه
__ خيبة ظنونه / بـ حدّ السيف والشلفى
الله .. من فقدهم والجرح! وأقواسه
__ الموغلة فـ الدكون ، الرافضة تشفى!
أقفوا وصارت "عروق العيد يبّاسه!"
__ وأذّن للأشباح (ضيف الليل!) يوم أقفى
خلوّه في غربته .. وبْـ عزّ وسواسه !
__ لا الفكر صافي! ولا حتى البشر تصفى
في موعد العيـد ، كانوا بس جلّاسه !!
__ أربع كراسي خشب والصمت والمنفى
- مصعب خالد