اكذب ليا قلت لك وضعي سليم
قربي شوفي طعونك عن كثب
آتصبر .. لكن الله العليم
دمّ صبري من سكاكينك نضب
هو غلط لاصار لي قلب رحيم
علميني .. وإنتناسى هالعتب
وعلميني لامتى ضيقي مقيم
في حشاي.. وماتسوّين السبب
وإنتي اللي لو طلبتيني عظيم
من غلاك استسهله مهما صَعَب
خايف إني كنت مكرم لي لئيم
طاح دمعي له ولاطاح الحطب
إن تغيشمت برضا ماني غشيم
وإن دمحت أخطاك من طيب النسب
بالإشارة يفهم القصد الفهيم
إفطني للعشره.. البعد اقترب
الغلا..مامات لكنه سقيم
باقيٍ زلّة والأخلاق تخرب
كان حِجّة ماتسوينه.. حليم
اتقي شر الحليم ليا غضب!