صوت ... لإحساسٌ .. ما
 

.
.
سيد البيد وان مرت عليك الظعون
لاتسولف عن الغيمه وسرب القطا

سولف بقلبك لقلبك وبالك تخون
كسرة الملح في وجه السنين الخطا

كل حزن تمحور بك سكن بالعيون
لو تغمض يجيب السيل لوّه .. بطا

لو عصافير صدرك ماتعدن متون
كانت غصون قلبك بس ستر وغطا

مبهمٍ سادرٍ بالصمت وقت يحكون
صاخبٍ لاسكن خوف القلوب الوطا

لو تآلفت .. لك قلبٍ بعيد الظنون
لو تخالفت .. لك كفٍ تعشق العطا

من تغابيك مامره نشدت السكون
ليه يسكن ؟وكل الارض فيها سطى

.
.
مرت على الغصن بنت و طيرت طير
ولازال هالطير وسط التيه .. ويحوم
ريشه مسامات ذبح الشر .. والخير
وصوته كثر ماتهودل حزن ملموم
لو كان صدره عشق فرز الأعاصير
له عين تدمع سكات وقلب مزحوم
يُغبن .. إذا هبت الريح .. بـ معاذير
ويموت لاصار وسط البوح ويصوم
يشوف وجه السحاب أصلاً مغاتير
ويكفخ بلا وجهةٍ ويضيق .. ويهوم
يستل على حلم خالي من تفاسير
ويوقف وكن المدى متسربل بلوم
يحب من سايل الغيم .. الخماكير
ويغيب لحظة رضا ويبين من زوم
متعب ولكن .. يطش من التباشير
مايفتح الباب .. للتطنيش و النوم
صلفٍ متح .. مابصدره من تبارير
عن لايقولون بير القلب .. مهدوم
صبر صبر .. لين شاف من التعازير
والبارحه .. كف جنحانه عن الحوم
.
.