يارب هالدنيا بها تبدي نواوير وتغيب
.......................مره تزف اسرابها صوبي/ ومره تحتجب
شاعرويسبقني الشعر/ ويهزهز الغصن الرطيب
......................تتلون جروحي من الالوان ..الوان الرطب
عيني يغازلها الكرى/ لكن ابد ماتستجيب
...................وش لون تهجع واعذب الاحلام يشربها الهدب
مابين يأسي والجروح وسطوة الليل الكئيب
.................صارت ضلوعي من حطب/ ياحظ من هو يحتطب
اساير الدنيا ولايعجبني احساس المريب
...................واكتب على وجه السنين العوج بانفاس اللهب
ماني خويك يالندم /ولا انت عذري يالنصيب
..........................ولاعاد تطريني ببالك ياخطاي المرتكب
ولاني مدور لك برا /ولاني معرضك الطبيب
.........................لو تشتكي في كل ليله يالضمير الملتهب
خلك كذا يمكن من جروحك في اعماقي تشيب
..................وتصير صوره من بياض/ تزين اطراف الكتب
كم هاجسً يقول لي ضيعت دربك ياغريب
..........................وانا اقول المغترب/ يحيا ويفنى مغترب
والغربه غربة روح تسبح داخل الصمت الرهيب
...................ماهي بغربة اهل / واوطان /ومفارق من تحب
لو يستقيم الحظ ماخفت موازين اللبيب
.............................ولا يــقلد للسيوف/ الاقلايد من ذهب
ويلقى كريم الوجه من اسمه ومن فعله نصيب
......................وابو لهب /حظه لهب/ من كف حمالة حطب
ناسً تغمض للهدف/ والي يغمض مايصيب
..............................لكن على نيشانها ياتي هدفها منصلب
واحلى المشاعر ماتثنى تنحسب لاول حبيب
.......................اول لقا/ واول طرب / واول رجا/ واول عتب
عزي لقلبً عزته في كل خير وكل طيب
.....................وصل غدير الماء/ وهوعطشان/ لكن ماشرب !!
حبه يورثه العنا/ والقهر/ والجرح العطيب
........................حبً من اجله كم بكى (قيس الملوّح) وانتحب
حتى الهوى ! خان السكوت /وصار مضماره رحيب
........................له بايع وله مشتري/ والعرض زاد عن الطلب
دنيا تقلب/ لوطلبناها/ ابد ماتستجيب
............................ اخر موانيها شقا ..واصدق امانيها كذب